Kemen Dantza taldeak gertu du jada bere urteroko Amaia KZko hitzordua. Hain zuzen, larunbat honetan izango da, 18:00etan, eta dantza taldeko formazio guztietako dantzariak igoko dira oholtzara. Euskal herriko txoko guztietako dantzak ekarriko dituzte, eta emanaldiarekin euskal kulturaren eta tradizioen transmisioa sustatzen du.

Sarrerak salgai daude dagoeneko, eta Amaia KZren orrialdean eros daitezke. Modu presentzialean sarrerak lortu nahi dituenak Luis Marianoko turismo bulegora jo beharko du, eta Amaia KZko txarteldegian ere ahalko dira lortu soberan egotekotan, ekitaldia baino ordubete lehenagotik hasita.

Biharko osoko bilkuran, Irungo bi kiroldegiak kudeatzeko hiru urterako kontratu plegua eztabaidatu eta onartuko dute. Bide horretan, David Nuño Elkarrekin-Podemoseko bozeramaileak gogoratu du, Bidasoa XXI-k kudeatu izan zituela urte luzez 2012tik bi kiroldegiak, eta aurreko agintaldian udalak erreskatatu egin behar izan zuela ekonomikoki, “hiruzpalau hilabetero 300.000 euro jarri genituen”.

Kudeaketa mota hau “bideraezina” dela diote, eta PSE-EEk eta Elkarrekin-Podemosek osatutako aurreko agintaldiko koalizio gobernuan, horren gaineko eztabaidak eduki zituztela oroitu du Nuñok. “Gu oinarrizko zerbitzu publikoak kudeaketa publiko bidez egitearen aldekoak gara, eta uste dugu kirola oinarrizkoa dela”. Azkenean, bi urteko kontratu lehiaketa bat irekitzea erabaki zuten bi alderdiek, eta bien bitartean, bi urte horietan, udalbatzako alderdiek kudeaketa modeloa eztabaidatzea zuten asmo.

Eztabaida egin ahal izateko, kudeaketa ereduen ikerketa bat egitea eskatu zuen alderdi moreak. Ordutik, bi urte pasa dira eta ez dela ikerketarik ez eta elkarrizketarik egin gainontzeko alderdiekin salatu du Podemosek. Egun, BPX enpresak kudeatzen ditu bi kiroldegiak eta ohartarazi dute gainean dela kontratua bukatzeko epea, iraila, hain zuzen ere.

Biharko plenoan, kudeaketa pribatua proposatuko dute, eta aurreratu dute koalizio moreak kontra bozkatuko duela. “Kudeaketa pribatuak bukatu egin behar dira, herritarrei ez dielako mesederik egiten ordaintzen segitzea norbaitek negozioa egin dezan”.

Kudeaketaz gain

Horrez gain, 2019tik lan gatazka bat dagoela gogoratu du Nuñok. “Plantillak urteko soldata bat kendu zuen kudeaketaren zenbakiak bat etor zitezen”. Dena den, egungo erosahalmenenera ez direla iritsi salatu du bozeramaileak, eta problemak izan dituztela hitzarmena berritzeko azaldu dute.

Bestalde, kiroldegiko bazkidetzaren prezio igoera izan du hizpide, aurten %18 igo baita. Patronatua 2012an desegin zenetik eta kudeaketa pribatua denetik, etengabe aritu dela prezioa igotzen adierazi du Elkarrekin-ek.

Era berean, bai Artalekuk eta bai Azken Porturen azpiegituren gabeziez aritu da. Artalekuk “pena” ematen duela dio Nuñok, eta Azken Portun “ez daude martxan ezta dutxa guztiak” dio. “Inbertsio handiak egin behar dira eta ez dira egiten ari”.

Turismo kanpaina bat jarri du martxan udalak Itzulia txirrindularitza lasterketa Irundik abiatuko dela probestuz. Leloa, Irunen barne izango da, eta irundarrak nahiz bisitariak festa handiaz gozatzera animatu nahi dituzte, “kirolaz baino askoz harago baitoa”.

Kanpainarekin, hiriaren DNAren eta paisaiaren “barne” diren ezaugarriak nabarmendu dituzte, hala nola, kultura, natura, gastronomia, merkataritza eta, nola ez, kirola. Bost ardatz horietan banatzen da hiriaren eskaintza, eta Irun “ekitaldiak antolatzeko hiri gisa” finkatu nahi du udalak, baita haren posizionamendu turistikoa ere.

Kanpaina udal euskarrietan, markesinetan, komun publikoetan eta kaleko publizitate pantailetan ikus daiteke. Gainera, ehun banderola jarri dituzte txirrindularitza lasterketa igarotzen den puntuak apaintzeko. Lasterketa apirilaren 1ean abiatuko da San Juan plazatik.

21. Bioterrarako bi hilabete eta erdi geratzen diren honetan (ekainaren 7tik 9ra egingo da) azokan landuko diren zenbait eduki aurkeztu dituzte. Gainera, Garikoitz Aiestak, Ekolurrak-eko (Euskadiko Nekazaritza eta Elikadura Ekologikoaren Kontseilua) ordezkariak egungo datuak eman ditu.

Ekolurrakeko ordezkariak aipatu duenez, Euskadi urrun dago 2030 urterako Europan ezarri dituzten helburuetatik. 2030 urterako lurren %25a irizpide ekologikoen arabera lantzea da helburua, eta egun, Euskadiko lurren %5ak besterik ez du lanketa prozesu hori ziurtatzen duen ziurtagiria. Soilik 10.772 hektarea dira ziurtagiri hori dutenak. Hala ere, aurten %18ko hazkundea izan dela zehaztu du, 1.668 hektareak eskuratu zuten iaz zigilua. Ekoizle kopuruari dagokionez %3ko igoera jaso du kontseiluak, hau da, 51 profesionalek eman zuten izena ekoizpen ekologikoan. Bestetik, mahats eta harategien ekoizpen ekologikoa hazten ari diren sektoreetako bi direla azaldu du. Azken urtean animalien ekoizpenak %9,7ko hazkundea izan du, mahastizaintzak berriz %14ko igoera.

Europak ezarritako neurriak betetzeko “erronka” handia dela eta eskakizunak betetzeko instituzioek babesa ematen jarraitu behar dutela esan du Aiestak. Aldi berean, ekintzarako deia egin du. “Gizartearen zati esanguratsu bat oso kontzientziatuta dago ekologiari, ingurumenari, osasunari, bizimoduari eta elikadurari, baina ekintzarako dei bat egin behar da. Bertako elikagai ekologikoak bilatu eta erosi”.

Espazioaren %75a erreserbatuta

Bioterran ekoizpen ekologikoarekin, bio-eraikuntzarekin, energia berriztagarriekin eta kontsumo arduratsuarekin lotura estua duten enpresek parte hartzen dute. Dagoeneko espazioaren %75a erreserbatuta dutela jakinarazi du Maialen Gaztañagak, Bioterrako zuzendariak.

Azokan adibidez, Fahion Revolution erakusketa izango dute. Bioterran modari arreta berezia eskaintzen diote; izan ere, asko kutsatzen duen sektorea da. Modaren industria sistematikoki eraldatzeko intentzioarekin antolatu dute erakusketa. Jantzigintzako hondakinen kudeaketak dakartzan arazoak eta ekoizpen katearen fase horrek ingurumenean eta gizartean duten inpaktua azaleratuko dute bertan.

Azkenik, Surfrider Españak Bioterrarekin bat egin du aurten ere, eta, beren arteko harremana sendotzeko, hitzarmen bat sinatu dute. Ekaineko bigarren astean, beraz, Gipuzkoan filmatutako ikus-entzunezko zenbait piezen inguruko eztabaida saioak antolatuko dituzte. Halaber, ekainaren 1ean Donostian eta Deban egingo duten Zigarrotoi ekimenarekin bat egiteko deia egin dute. Zigarrotoian zigarrokinak jasoko dituzte.