EH Bildu, Elkarrekin-Podemos Irun, PP eta PSE-EEk babesa erakutsi diote etzirako Osasun Bidasoa plataformak “eskualdeko osasun publikoaren prekarizazioaren aurka” deitu duen manifestazioari. Larunbat honetan izango da, San Juan plazatik abiatuta, 18:00etan.

Berretsi egin dutela osasun publikoa “defendatzea” eta lehen mailako arreta “hobetzea” diote, martxoaren 22an aurkeztu baitzuten horren babeserako mozioa.Bidasoko osasun publikoa hobetzeko inbertsioen “gainbehera eta gabezia” izan zituzten hizpide mozioan, baita ere lehen mailako arretako zentroen “baliabide eta gaitasun falta” ere.

“Okertze horren isla dira zentroko anbulatorioaren eta Dunboako anbulatorioaren egoera”. Biak ala biak eraberritzeko eta eguneratzeko “premia nabarmena” dagoela diote eta salatu dute espazio falta gero eta nabarmenagoa dela. “Ezin da denboran gehiago luzatu”.

Bide horretan, Oinaurren hirugarren anbulatorio bat eraikitzearen alde agertu dira, ospitalea handitzearekin eta indartzearekin batera. Azpimarratu dute ere “oso garrantzitsua” dela osasun zerbitzu hurbilak eta irisgarriak izatea. “Berretsi egiten dugu osasun publiko, unibertsal, hurbil eta kalitatezkoarekin dugun konpromisoa, herritarrei zerbitzurik onena eta bertako langileei lan baldintza duinenak bermatuko dizkiena”.

Babesa erakutsi diote Bidasoko ESIko osasun profesionalei “beren aldarrikapenetan, herritarrei osasun arreta hobea emateko ezinbestekoa baitira”.

Oraindik ere posible da Eskola Feministan izena eman, epea irekita baitago hilaren 19ra arte. Irungo emakumeei zuzendutako programa bat da, eta haien bizi kalitatea eta ongizatea hobetzen laguntzeko ikastaroak eta tailerrak antolatu dituzte horretarako. Martxoan jarri zen martxan.

Lau tailer ari dira eskaintzen: Zure istorioan barrena: zure arte liburua sortuz; Txirigota feministak; Euskal Herriko jaietako aldaketa sozial eta kulturalen inguruko elkarrizketak; eta munduko emakumeen arteko topaketa gastronomikoa.

Izen ematea aurrez aurre egin daiteke Emakumeen Etxean (Istillaga plaza, 8), astelehenetik ostiralera, 16:00etatik 20:00etara, baita udalaren orrialdearen bidez ere. Haurtzaindegi zerbitzua eskainiko dute.

Tailerren nondik norakoak

Zure istorioan barrena: zure arte-liburua sortuz tailerra emakume migratzaile eta arrazializatuei zuzendutakoa dela azaldu dute eta aukera eman nahi diete haien istorio pertsonala modu artistikoan eta sormenez kontatzeko, liburu baten bidez.

Txirigotak Kadizko kantu ezagunenak dira, eta Txirigota feministak tailerrean emakumeek inauteri giroko haien testu propioa osatzen arituko dira, modu kolektibo eta interaktiboan eta euskal tradizioan inspiratuta.

Euskal Herriko jaietako aldaketa sozial eta kulturalen inguruko elkarrizketak tailerra Maggie Bullen antropologoak eta Mertxe Tranche historialari eta idazleak eskainiko dute ikuspegi feministarekin.