Auzoen gaineko azterlanaren datuak eman zituen Irungo Udalak pasa den otsailean. Balorazio orokorra 6,2 puntukoa izan zen eta “ongizate maila altua” dagoela hirian baietsi zuten. Gaur, baina, EAJk azterlana aztertu ondoren, ez dute bat egiten udalak egindako ondorioekin. Nagusiki, irundarren %46ak, batez ere 50 urtetik b eherakoek, Irun bizitzeko leku egokia ez dela esan duelako.

Inkestatuen banaketa ez dela zehaztu diote eta irundarrek helarazten dituzten datu kezkagarrietako bat bera ere ez aipatzea deitoratu dute. Hala, “herritarrengana gardentasun eta zintzotasun ariketa batean”, talde jeltzalean bere ondorioak atera ditu. Irunen Gipuzkoako bataz besteko hainbat daturen azpitik edota gainetik dago hiria, esaterako, gazte kopurua ohi baino txikiagoa da eta langabezia tasa bataz bestekoa baino altuagoa. Hona hemen, hitzez hitz:

• Irunen gazteen ehunekoa Gipuzkoako batez bestekoaren azpitik dago, baina 65 urtetik gorakoena batez bestekoaren antzekoa da.
• Biztanleria atzerritarrari dagokionez, batez bestekoa baino ia 3 puntu gorago daude.
• Langabezia tasan batez bestekoa baino 3 puntu gorago daude.
• Batez besteko errenta pertsonala 4.000  eurokoa da, Gipuzkoako batez bestekoa baino txikiagoa.
• Biztanleko BPGa 5.400 eurokoa da, lurraldekoa baino txikiagoa.
• Biztanleriaren %46ak dio Irun erdipurdikoa, txarra edo oso txarra dela bizitzeko. Are gehiago, adinean behera egin ahala, pertzepzio negatiboak gora egiten du.
• Immigrazio ehuneko handiena duten auzoek dute pertzepzio txarrena, bai auzoari dagokionez, baita hiriari dagokionez ere. San Migelek, adibidez, ez du gainditzen. 10etik 4,7 puntu eman dizkiote.
• Irungo baloraziorik txarrena gure hirian jaiotakoek egiten dute.
• %52,8k uste du Irungo egoerak okerrera egin duela. Kasu horretan ere, pertzepzioak okerrera egiten du adin tartea jaitsi ahala.
• Herritarrek gutxien baloratzen dituztenak mugikortasuna, zerbitzuak, ekipamenduak, TAO eta aparkalekuak dira.

Jeltzaleek biztanleriaren zahartzea nabarmendu du, baita ere Irun adinekoen beharretara egokitzearen garrantzia ere. “Deigarria eta bitxia” egin zaie adinekoak izatea hirian arazo gutxien ikusten eta adierazten dituztenak. Errealitate horren aurrean ea gazteak non uzten diren galdetu dute: “Haien ongizatea, etorkizuna gure hirian, Irunen, non geratzen dira?”.

Azterketak segurtasuna hobetzeko neurriak bere gain ez hartu izana ez dutela ulertzen adierazi du EAJk, “jakinda hori dela gure herritarrak gehien kezkatzen dituen gaietako bat”.

Azkenik, zintzotasunaz aritu dira: “Irunek zintzotasuna merezi du, bizi dugun egoera onartzen duen udala behar du, eta horrela, guztion artean, errealitateari aurre egin eta gure hiria hobetu. Hau da gure nahia eta helburua”. Arazoei aurre egiteko, lehenik, horiek onartu behar dela diote eta horietan sakondu ahala, “konponbide osoak eta bideragarriak eskaini”.

Irungo Udaleko Gizarte Ongizateko arloa adingabeekin diharduten langileak trebatzen ari da, haurren babesgabetasun egoerak aurretik detektatzeko. Programa horren berri gaur eman du Nuria Alzaga ordezkariak. “Profesionalen etengabeko prestakuntzak haur eta nerabeentzako zerbitzu eta programen kalitatea hobetzea dakar”.

Udaltzaingoko langileak nahiz kirol, hezkuntza eta osasun arloetako teknikariak parte hartzen ari dira programan. Trebakuntza zuzendaria Leire Migez psikologoa da, haurren babesgabetasun egoeretan aditua eta Gipuzkoako Foru Aldundiko Haurrak Babesteko Zerbitzu Espezializatuko haur eta nerabeen gaietarako eskualdeko taldeetan ibilbide luzekoa.

Saio teoriko eta praktikoak otsailetik maiatzera bitartean egingo dira, parte hartzaileei haur eta nerabeak babesteko oinarrizko tresna eta bereizgarriak emateko. Era horretan, detekzioa hobetu nahi dute bai eta jakinarazpena. Helburua, parte hartzen duten profesionalek beren ezaupideak bateratzea ere bada, haurrak babesteko arloen laguntza sarea sortzeko.

Trebakuntza jasotzen lehenak Udaltzaingoko kideak eta Ertzaintzako hamabost kide izan dira, baita Gazteria Arloko lankideak ere. Azken hauen kasuan ia plantilla osoak hartu du parte, bai udal teknikariek eta gaztelekuetako eta haurtxokoetako profesionalek ere.

Hurrengoak formakuntza jasotzen kirol arloko langileak, eskola kiroleko begiraleak eta adingabeekin lan egiten duten kirol taldeetako profesionalak izango dira, hilaren 21etik 28ra. Sei saiotara joango dira, berriz, ikastetxeetako langileak (Haurtzaindegiak, LH, DBH, Batxiller eta Lanbide Heziketa). Hauen kasuan formakuntza otsailean eta martxoan izango da.

Azkeni, apiril eta maiatzerako, osasun arloko langileentzako ikastaroak egingo dituzte ere. Osakidetzako gizarte langileei, pediatrei, haurrentzako psikiatria taldetako profesionalei eta 14 urtetik beherako adingabeekin lan egiten duten familia medikuei zuzendutakoa izango da.

Hiruna orduko bi saio egingo dituzte parte hartzaileek, goiz nahiz arratsaldez, euskaraz edo gaztelaniaz. Landuko dituzten gaien artean, lehenbiziko saioan, legedia eta udal eta foru baliabideak izango dituzte hizpide: haurren eskubideak eta egungo legedia; gizarte zerbitzuen mapa; haur eta nerabeen oinarrizko beharrak; tratu ona; eta gurasoak, aldaketaren eragile.

Bigarren saioan haur eta nerabeen balizko arrisku eta babesgabetasun egoeren detekzio eta jakinarazpena eta esku hartzeko jarraibideez arituko dira: Balora erremintaren  laburpena; babesgabetasun egoera motak; jakinarazpenak barnean hartu beharreko oinarrizko kontzeptuak; eta kasu praktikoak.

Formakuntza honek trebakuntza ebaluatzeko balioko duela ere azaldu du udalak. Horrez gain, psikologoak parte hartzaileek zalantzak argitzen ari da ere. Oraingoz trebakuntza jaso dutenek, poliziek, “oso balorazio” ona egin dute horrena.